Ni mara chache sana ambapo unapata mtu ambaye anafurahia maisha katika kitongoji duni anavyofanya Bridgit Atieno.Akiwa ameishi Sinai, kitongoji duni kilichoenea katika Eneo la Viwandani jijini Nairobi, tangu alipozaliwa, Bridgit anaelewa mapambano ya kila siku ya kutafuta riziki.
Anatumia ukurasa wake wa Facebook kuangazia shida ambazo wakazi wa mitaa ya mabanda wanapitia kila siku ili kufaulu. Kutoka kwa hali duni ya vyoo hadi huduma duni, Bridgit huwachorea wafuasi wake picha halisi ya maisha katika geto kwa fahari na maelezo ya kina yasiyopimika.Jumbe zake nyingi ni kuhusu mapishi yake ya kila siku, yanayoonyesha jinsi anavyogawanya pesa kidogo ili kupata chakula.
Akiongea na wanahabari Bridgit aliwaambia kwamba wazo la mapishi hayo ni kuwasaidia Wakenya ambao wanakabiliana na hali ngumu ya kiuchumi ambayo imekuwa ikikumba nchi katika miaka ya hivi karibuni. Katika kukabiliana na ongezeko la viwango vya ukosefu wa ajira na kupanda kwa bei ya vyakula, mama asiye na mwenzi aliye na mtoto mmoja amepata njia bunifu za kujikimu.
Kwa rasilimali chache na azimio la kuweka chakula kwenye meza, kujaribu viungo vya bei nafuu na kuvibadilisha kuwa milo ya ladha imetosha. “Resipi zangu ni kwa ajili ya wale ambao hawapendi mambo magumu,” alisema na kuongeza kuwa mtazamo chanya umemfanya apitie changamoto nyingi.
